Accueil du site > òc > Istòria

Istòria

Contenu de la page : Istòria

L’istòria de Crest debuta a l’iatge-meian. Bastiá au secle detzen per la familha daus Arnaud, la torre, mai naut donjon de França (52m), quilhaa sus una cresta de rochàs que a bailat son nom a la vila, agacha un daus rares accès de las montanhas dromèsas. Dau sègle dotzen au ségle quatorzen, los comtes dau Valentinés e los avesques de Diá se faguèran la guèrra que se ditz : « daus episcopaus »

Crest es partejaa en doas parts : lo chastel d’en naut (qu’es nòstra torre) e lo borg daus avesques. Fin finala, los comtes ganhan quèla guèrra en 1356, e ansin liian los dos chastèus que fan plus qu’una fortalesa. Ne’n veièm encuei sonque l’entorn fach de muralhas e de rochàs. La torre que Lois XIII vouguèt far escrancar coma lo resta en 1632 es tot çò que demòra d’aquèla fortalesa. La torre, jamai presa e residència daus senhors, es veguá coma un daus mai famòs bastiments de son epòca. Daubé l’establiment de mai que d’un convents au sègle detz-e-seten, Crest fuguèt una vila catolica que vouguèt empachar l’esbandiment dau protestantisme dins la region. La torre fuguèt una preson e fins au sègle detz-e-noven, veguèt dins sas muralhassas barrats protestants, libertins, respublicans e condemnats de drech comun. Se pòt veire encuei un molon de graffiti sus las parets que son de testimoniatges vius daus patiments e daus espers daus presoniers. De sas terrassas dau defòra, avèm una vista panoramica de la Vau de Droma que non se pòt pas mai. Aus sègles detz-e-seten e detz-e-ueiten, Crest es una granda vila comerçanta e prospèra. Vei l’esbandiment de l’industri dau drap, dau coton e de la seia. De novèlas fabricas se bastissan. Encuei, la vièlha vila per son traçat, las charrèiras e los quartiers per lors noms nos adusan totjorn una idèia d’aquèu riche passat. Crest, pòrta dau pargue dau Vercòrs, es una vila de mai de 8000 abitants, animaa tanben per d’eveniments culturaus grandàs. Giras a la descubèrta.

Seguissètz los claus de bronze gensats dau blason de la vila plaçats au sòu. Vos sonharètz que se vei que lo traçat de la vila es ordonat d’un biais logic : Tot en naut quilhat sus la cresta, lo senhor( la torre) Dessota, los clergues (los convents e las gleisòlas). En bas, lo pòples (quartier ovrier). Las doas giras se rejunhan au pè de la torre e permetan de descubrir tot lo Crest vielh (doas oras de vesita)

Rochafòrt (una ora de vesita).

Au despart dau pònt Mistral (poëta occitan de Provença), se pòt rejúnher la torre. En passant per la plaça dau merchat au blat, anirètz vès las pòrtas dau quartier populari de Rochafòrt (un còp d’uelh sus la quincalhariá anciana dins la maison Peire de Richard). Arrestètz vos per remirar un daus cinc lavaors de la vila e lo promier collègi (1515). A la finta cima d’un grand eschalier (124 marchas), trovarètz la chapèla daus cordeliers, reconstrucha au secle quatorzen per los fraires de l’òrdre de Sant Francès d’Assisi. Sus las terrassas, aurètz una vista estonanta sus los cuberts de color òcra de la vila vièlha. Dau viòu dau cluchier, veiètz la glèisa Sant Sauvaor (sègle XIX) reconstrucha dins lo sens NS per crear una plaça dau merchat dins l’encastre de la vièlha vila. Dins la vila bassa, los noms de las charrèiras rapelan encara los mestiers d’un còp èra dins aquèu quartier : courre-commère, cuireteries, escorche-boeuf....

Carcavel (una ora de vesita)

Partètz de la torre o de son parcatge. Darrier vestigi daus barris de la vila, la pòrta Montsegur se duèbre sus las caladas de la vila nauta. De la fònt de Saborin au lavaor de Carcavel restontissan encar los racontes occitans daus teisserands dau quartier que chantava lo poëta Roch-Grivel. Charrèira de la rodariá, de la ferronariá, daus chapeliers, totas aquelas petitas charrèiras rapelan las ancianas corporacions de mestiers. Au destorn de la charrèira de las vièlhas presons, la representacion dau blason daus Princis de Monacò atesta de lor pover sus la vila de Crest de 1642 fins a la Revolucion Francèsa (1789). Tots los març a 18 oras en julhet e aòst, l’ofici dau torisme prepausa de vos guidar per vos far descubrir de subjects especiaus, Crest e sos mestiers ancians per exemple. L’achamp se fai davant l’ofici dau torisme.

Adresses utiles

associations

Les Patoisants de la Vallée

Télécharger la Vcard